Moin Vadder war seit zwä Johr, seit moi Mudder gestorwe is, allä in soim Haus. Er hot geputzt, gekocht, soweit alles klar. Moin Vadder is eigentlich en luschtische Kerl, awwer so allä hot`s em doch nimmi g`falle. Vor em halwe Johr hot er g`saat er breischt Hilfe im Haus, putze, koche uns so, ob mer do net mol nooch eenere Polin odder Rumänin gucke kennt, die ihm die Hausärwet schafft. Ja, des wär gut, hab isch gesagt. Dodruff er: „Mir hänn jo noch unser Gäschtezimmer frei. Des is schää oigericht, groß genug, do kennt se jo wohne.“ Dass er dann a net so allä wär, wann mol was is.
Do häts jo bei mir schunn klingele misse, isch bin jo de Sohn vumm Vadder. Awwer er iss jo schunn fascht 80 Johr alt. Alla hopp hab isch gedenkt, gucke mer mol.
Ratz fatz, schunn war die Yolanda do. Is ins Gäschtezimmer in moim Vadder soi Haus eingezooge. Die Yolanda iss e ganz liewi, ca. 40 Johr alt, kann e bissel Deitsch unn is fleißisch. Moin Vadder war glei ganz häppy.
Erscht hänn se än neie Rollator gekaaft. Marke Hollister. Mit Frontspoiler, Einzelrad-Aufhängung, Öldruckbremse, Schorleglas-Halterung und in silbergrauem Rally-Look. Denn Rollator hot er awwer noch änere Woch widder ins Eck gestellt. Denn braucht er nimmi, hot er gsaagt. Die Yolanda hot em wohl widder de uffrechte Gang (unn annere Sache) beigebrocht.
Seit die Yolanda do is, gehen die zwää ämol in de Woch in die Stadt oikaafe.
Er is jetzt vunn owwe bis unne fascht „runderneuert“. Hoor immer sauwer gschnitte, Hemde unn Hosse vunn Diesel odder Bonita Men, Sneekers Schuhe. Er is a jeden Daag frisch geduscht, rasiert unn er riecht immer foi.
Isch mään grad, dass er jeden Daag jünger wird.
Seit 4 Woche fahre se jeden Sunndaag zum Tanztee nooch Derkem ins Kurhaus.
Er hot mich beufftragt den Rollator im Internet zu verkaafe, er braucht en nimmi.
Vor e paar Daag is e Wasserbett geliefert unn im Schloofzimmer vunn moim Vadder uffgestellt worre.
So langsam wird mir`s schwindlich. Isch gönn moim Vadder jo jeden Spass, awwer ich selwer geh jetzt schunn stark uff die Rente zu, unn mit em klääne Briederle odder Schwesterle rechen isch eigentlich nimmi. Awwer wie hääßt`s?
Wann e aldi Scheier brennt, dann gibt se ganz schää Hitz. Mer lernt wohl nie aus.
Des määnt de Neiheffer Bachschitz
De Bachschitz 